Latif Demolli, sekretari i Federatës së Boksit të Kosovës, ka reaguar pas lajmit të trishtë për ndarjen nga jeta të legjendës së boksit kosovar, Nazif Gashi. Në një reagim në rrjetet sociale, Demolli e ka cilësuar humbjen e Gashit si një humbje të madhe për sportin e boksit në Kosovë dhe ka theksuar kontributin e jashtëzakonshëm të tij në zhvillimin e këtij sporti.
“Sporti i Kosovës është në zi. Ka ndërruar jetë Nazif Gashi, një nga emrat më të mëdhenj dhe më të respektuar të historisë së boksit kosovar, figurë që për dekada me radhë përfaqësoi me dinjitet ngjyrat e Prishtinës dhe të Kosovës në arenën vendore dhe ndërkombëtare. Nazifi ishte shtylla kryesore dhe motivi i ekipit të Prishtinës për të gjitha rezultatet e arritura të klubit të boksit “Prishtina”,” ka shkruar Demolli.
Ai gjithashtu ka shprehur ngushëllimet më të thella familjes, miqve dhe gjithë komunitetit të boksit, duke nënvizuar se trashëgimia e Gashit do të vazhdojë të frymëzojë gjeneratat e reja të sportistëve kosovarë.
