Kryetari i Kuvendit të Kosovës, Dimal Basha, priti sot ambasadorin e Gjermanisë në Kosovë, Reiner Rudolph, në një takim që shërbeu edhe si mirëseardhje për vizitën e tij të parë në vend.
Në njoftimin zyrtar bëhet e ditur se, gjatë takimit u diskutua situata aktuale politike në Kosovë dhe rëndësia e avancimit të vendit në institucionet ndërkombëtare.
Basha theksoi se Kosova ka përmbushur të gjitha kushtet për t’u bërë pjesë e Këshillit të Evropës dhe se aplikimi për statusin e vendit kandidat duhet të miratohet menjëherë.
Ai gjithashtu kritikoi masat ndaj Kosovës, duke i quajtur të padrejta, dhe falënderoi miqtë gjermanë për mbështetjen e vazhdueshme në rrugëtimin drejt Bashkimit Evropian.
“Masat ndaj Kosovës janë të padrejta dhe që duhet të hiqen menjëherë, gjithmonë duke llogaritur në miqtë tanë gjermanë që kanë qenë dhe janë mbështetës të rrugëtimit tonë drejt BE-së”, theksoi kryetari i Kuvendit.
Basha gjithashtu vlerësoi procesin zgjedhor në vend, duke e konsideruar Kosovën shembull të demokracisë dhe tranzicionit paqësor të pushtetit në rajon, dhe nënvizoi rëndësinë e integrimit të të gjitha komuniteteve në jetën shoqërore dhe politike.
Në bisedime u diskutua edhe situata rajonale, ku kryeparlamentari theksoi se normalizimi dhe demokratizimi i Serbisë është kyç për stabilitetin dhe zhvillimin e rajonit.
Ai gjithashtu shprehu mirënjohje për mbështetjen e shtetit gjerman, të cilin e cilësoi partner të rëndësishëm të Kosovës në rrugëtimin drejt integrimit evropian.
