Ernest Muçi do të mbetet pjesë e Trabzonsporit, ekip që tashmë ka njoftuar Beshiktashin për blerjen e tij të plotë.
Mediumet turke kanë raportuar se transferimi i përhershëm i Muçit te Trabzonspori, do të zyrtarizohet së shpejti, me futbollistin e Shqipërisë që do të firmos kontratë afatgjate.
Muçi është huazuar këtë sezon te Trabzonspori, ekip që i ka paguar Beshiktashit 1 milionë euro për huazimin e tij, ndërsa për blerjen e plotë do t’i paguajë 8.5 milionë euro në pesë këste.
Te Trabzonspori janë të kënaqur me 24-vjeçarin, që në javët e fundit ka qenë vendimtar për ekipin duke e futur në garë për titullin e kampionit.
Në tri ndeshjet e fundit, Muçi ka shënuar 5 gola dhe ka bërë një asistim, ndeshje të cilat i ka fituar Trabzonspori për t’u renditur i dyti në tabelë me dy pikë më pak se Galatasaray që është lider.
Muçi ka kontratë me Beshiktashin deri në vitin 2027, ndërsa këtë javë Trabzonspori do të përballet me ish-ekipin e tij, ku presin shumë prej mesfushorit shqiptar.
