Asociacioni i Gazetarëve të Kosovës (AGK) ka dënuar fuqishëm gjuhën e konsideruar “të papërgjegjshme, sulmuese dhe shumë të rrezikshme” të anëtarit të Komisionit Qendror të Zgjedhjeve, Sami Kurteshi, përfaqësues nga radhët e Lëvizjes Vetëvendosje.
Reagimi i AGK-së pasoi një deklarim publik të Kurteshit, i cili e cilësoi organizatën “Aleancë të Grupeve Kriminale” dhe listoi disa media, të cilat sipas tij funksionojnë si “vrasës me pagesë”.
AGK-ja vlerëson se këto akuza të pabaza përbëjnë rrezik real për nxitjen e sulmeve të mundshme ndaj gazetarëve gjatë kryerjes së detyrave të tyre profesionale.
Organizata thekson se deklaratat e tilla përfaqësojnë vazhdimësi të një fushate linçuese kundër punonjësve të medias, me qëllim frikësimin e tyre dhe cenimin e lirisë së shtypit në vend.
“Këto akuza, përveç që janë të pabaza, paraqesin rrezik real për sulme të mundshme në të ardhmen ndaj gazetarëve dhe pjesëtarëve të mediave në punën e tyre profesionale në terren. Deklaratat nxitëse të urrejtjes të z. Kurteshi janë vazhdimësi e një fushate linçuese ndaj gazetarëve, me qëllim frikësimin e tyre dhe minimin e lirisë së medias në vend”, thuhet në reagim.
Në reagimin e saj, AGK i bën thirrje Lëvizjes Vetëvendosje, kryeministrit dhe liderit të saj Albin Kurti, si dhe Presidentes së Republikës, Vjosa Osmani, që të marrin në konsideratë largimin e Kurteshit nga pozita në KQZ./teve1.info/
