Policia e Kosovës, në bashkëpunim me Programin për Siguri (KSSP) ka organizuar një trajnim njëjavor, me qëllim të avancimit të kapaciteteve kibernetike për hetuesit që punojnë me raste të ndërlikuara në Surface Internet, Darknet dhe Darkweb.
Në njoftimin e Policisë së Kosovës është bërë e ditur se trajnimi përfshinë disa fusha sigurie.
“Trajnimi përfshin hetimin potencial të trafikimit të paligjshëm të armëve, teknikat OSINT, analizën e kriptovalutave dhe aftësi të tjera digjitale që ndihmojnë policinë të gjurmojë dhe të reagojë ndaj kërcënimeve të reja në hapësirën online”, njofton Policia.
Ky aktivitet zhvillohet në kuadër të Udhërrëfyesit Rajonal për Kontrollin e Armëve të Vogla dhe të Lehta dhe tregon angazhimin e përbashkët për bashkësi më të sigurta dhe bashkëpunim më të fortë rajonal.
Ndërkohë, në trajnim kanë marrë pjesë hetues nga të gjitha Drejtoritë Rajonale të Policisë.
