Një hulumtim i gazetarit investigativ, Domagor Margetiq për një mizori në Bosnjë gjatë luftës së fundit atje, ka marrë vëmendje botërore.
Ajo që e ka shtuar kureshtjen në këtë çështje janë pretendimet e kroatit se ka materiale te mjaftueshme që dëshmojnë se presidenti aktual serb, Aleksandar Vuçiq, ka qenë i përfshirë në ashtuquajturin “Safarin e Sarajevës” ku janë qëlluar me snajper civilët në Sarajevë.
Madje, gazetari investigativ kroat, Domagor Margetiq, ka dorëzuar dosje në prokurorinë e Milanos për ta hetuar lidhjen e Vuçiqit në këto ngjarje.
Margetiq për Tëvë1 tregon se ka punuar mbi dy dekada për nxjerrjen në dritë të këtyre fakteve.
“Në vitin 1992, Aleksandar Vuçiç, si student i ri, udhëtoi nga Beogradi si vullnetar ushtarak në njësitë ushtarake të serbëve të Bosnjës pranë Sarajevës. Ai u dërgua në një njësi paramilitare, të ashtuquajturën “Njësia Çetnike e Sarajevës së Re”, e komanduar nga Slavko Aleksiq, dhe atje qëndroi për disa muaj. Ajo ishte periudha kur sipas pretendimeve “safaritë njerëzore” nisën të funksiononin si aktivitet. Dhe pozicioni më i shtrenjtë dhe “ekskluziv” për të marrë pjesë në këto safari ishte Varrezat Hebraike në Sarajevë. Nuk ka dyshim, thuhet, se Aleksandar Vuçiç ishte i vendosur në Varrezat Hebraike në Sarajevë gjatë luftës, sepse ky pozicion mbahej nga njësitë e Slavko Aleksiqit”, thotë ai.
Gazetari kroat thotë se për këto krime ka raportuar edhe më herët por që sipas tij hulumtimet janë injoruar nga institucionet gjyqësore.
“Në vitet 1995–1996, Agjencia për Hetime dhe Dokumentim në Bosnjë dhe Hercegovinë nisi hetimet për “safarin njerëzor” dhe ato u udhëhoqën nga z. Dževad Ugljan, zëvendësdrejtor i agjencisë. E takova në maj të vitit 1996, dhe ai më tha se po drejtonte këto hetime. Madje më tha se kishte arrestuar një shtetas italian, i cili i kishte dhënë shumë informacione. Por fatkeqësisht, në shtator 1996, Dževad Ugljan u vra në Sarajevë. Ai u ekzekutua në qendër të qytetit, pranë makinës së tij, dhe nuk dihet se ku përfunduan këto dosje”, shprehet Margetiq.
Në anën tjetër, Presidenti i Serbisë, Aleksandar Vuçiq, i ka mohuar këto akuza duke thënë se kurrë nuk ka mbajtur pushkë në dorë.
Mediat italiane raportuan në fillim të tetorit se prokurorët në Milano kanë hapur një hetim ndaj shtetasve italianë që thuhet se u kanë paguar shuma të mëdha parash forcave serbe, në mënyrë që gjatë rrethimit të Sarajevës të mund të ishin “snajperë të fundjavës” dhe të vrisnin qytetarë për argëtim.
