Zahir Morina nuk lë ditë pa e vizituar varrin e babait të tij.
Beqir dhe Tahir Morina ishin mes 77 shqiptarëve të vrarë nga ushtria serbe, në fshatrat Poklek dhe Çikatovë e Vjetër.
Zahiri e kujton qartë periudhën e tmerrit që ai dhe bashkëfshatarët e tij përjetuan në Drenas.
“Më 17 prill, në ora gjashtë të mëngjesit, ushtria dhe policia serbe kanë ardhur nga fshati Gllanasellë dhe menjëherë kanë filluar t’i ndajnë burrat për t’i vrarë”, ka thënë Morina.
Ai tregon se vetëm pas disa ditësh ka mësuar se shumë nga trupat e të vrarëve ishin dërguar në Serbi. Sipas tij, pjesë të trupit të babait të tij edhe sot mungojnë.
“Pas dy-tri ditësh e kuptuam se trupat e shqiptarëve i kishin dërguar për në Serbi. Ndërkaq, jemi trishtuar kur i kemi parë trupat që ndodheshin këtu – disave ua kishin hequr edhe trurin. Aty i pashë trupin e babait dhe të axhës”, është shprehur tutje Morina.
Sot, Zahiri është baba i pesë fëmijëve, të cilët shpesh e pyesin për gjyshin që nuk e njohën kurrë.
“Shpeshherë fëmijët më pyesin se ku është gjyshi. Kemi pasur dëshirë ta kishim në mesin tonë”, ka theksuar Morina.
40-vjeçari kërkon drejtësi për babanë e tij, ndonëse e sheh të vështirë që kjo të arrihet për shkak të politikave shtetërore të Serbisë, të cilat vazhdojnë të mohojnë krimet e kryera në Kosovë.
