Në mesin e tetë ekipeve më të mira të Ligës së Konferencës, pa humbje e vetëm dy pikë larg vendit të parë, për Dritën nuk ka mundur të ketë debutim e paraqitje më të mirë në Evropë.
Kampionia e Evropës, e mposhti Shkëndijën të enjten mbrëma, në duelin vëllazëror të luajtur në “Fadil Vokrri”, për fitoren e dytë në UEFA Conference League. Krahas edhe dy barazimeve, gjilanasit e udhëhequr nga Zekirija Ramadani, kanë tubuar tetë pikë dhe zënë vendin e tetë në tabelë me gjasa të mira për të siguruar një vend në rrethin tjetër.
Në mesin e pak skuadrave pa humbje, Drita e ruajti këtë epitet të enjten mbrëma në prani të një numri të madh shikuesish dhe dy tifozerive të zjarrta “Intelektualët” e Gjilanit e “Ballistët” e Tetovës.
Triumfi në kryeqytet u arrit falë një goli të Arb Manajt në minutën e 20-të që doli të ishte goli i vetëm i ndeshjes, pavarësisht rasteve e përpjekjeve të tjera nga të dyja ekipet.
Shkëndija ka katër pikë në vendin e 25-të që nuk e dërgon tutje në rrethin tjetër, por deri në fund janë edhe dy ndeshje për tetovarët, kundër Slovan Bratislava dhe AEK Larnaka.
Deri në fund Drita do të luajë edhe dy ndeshje në kuadër të ligës. Më 11 dhjetor e pret AZ Alkmaarin holandez në Prishtinë dhe më 18 dhjetor udhëton në Madrid për duelin e findit në ligë kundër Rayo Vallecanos nga La Liga spanjolle.
