Qeveria talebane e Afganistanit akuzoi të martën Pakistanin për nisjen e sulmeve ajrore vdekjeprurëse gjatë natës në tre provinca lindore, ku mbeten të vrarë 10 persona – përfshirë nëntë fëmijë.
Sulmet vijnë një ditë pas një sulmi vetëvrasës në një kompleks sigurie në qytetin Peshaëar të Pakistanit, , i cili vrau tre oficerë dhe plagosi 11.
Ushtria pakistaneze e hodhi poshtë këtë pretendim, duke deklaruar se nuk kishte ndodhur asnjë operacion i tillë, ka raportuar Associated Press.
Mohimi erdhi pasi zëdhënësi i qeverisë afgane, Zabihullah Mujahid, shkroi në X se Pakistani “bombardoi” një shtëpi civile në provincën Khost, duke vrarë nëntë fëmijë dhe një grua.
Ai gjithashtu pretendoi për sulme shtesë në Kunar dhe Paktika që plagosën katër persona. Mujahid i përshkroi sulmet si “mizori” dhe “një shkelje të territorit afgan”, duke shtuar se Afganistani “e konsideron përdorimin e hapësirës ajrore dhe territorit të tij, si dhe mbrojtjen e popullit të tij, si të drejtën e tij legjitime dhe, në kohën e duhur, do të japë përgjigjen e nevojshme”.
Këto pretendime vijnë pas përleshjeve ndërkufitare të muajit të kaluar, pasi Kabuli akuzoi Pakistanin për kryerjen e sulmeve me dronë në kryeqytetin afgan.
Një armëpushim i ndërmjetësuar nga Katari dhe Turqia midis të dyja palëve mbeti në fuqi të martën, pavarësisht incidenteve të raportuara.
