Kryeministri në detyrë i Kosovës, Albin Kurti të premten mori pjesë në punimet e Samitit të Planit të Rritjes së Bashkimit Evropian, ku u mblodhën liderët e vendeve të Ballkanit Perëndimor bashkë me Komisioneren e BE-së, Marta Kos në Shqipëri.
Gjatë fjalës së tij për Planin e Rritjes, Kurti theksoi se Kosova po shkon drejt mbajtjes së zgjedhjeve të treta brenda një viti.
Ai u shpreh i sigurt se këto zgjedhje do të sjellin një qeveri të re që do të udhëhiqet prej tij dhe që do të punojë me ritme të shpejta në zbatimin e Agjendës së Reformave.
Sipas Kurtit, vendi ka mbetur prapa në zbatimin e reformave për shkak të zhvillimeve politike.
Ai kujtoi se Kosova ishte ndër vendet e para që kishte përmbushur Agjendën e Reformave, por tani sipas tij, është vonuar për arsye që nuk lidhen me vullnetin e institucioneve, por me rrethanat e krijuara pas zgjedhjeve të shkurtit, të cilat vonuan formimin e qeverisë së re.
Kurti përmendi gjithashtu masat ndëshkuese të BE-së ndaj Kosovës, duke theksuar se nuk do t’i trajtojë më këtë çështje dhe kërkoi heqjen e tyre të plotë.
Ai rikujtoi se asnjë shtet tjetër në rajon nuk ka qenë më i përgatitur për aplikimin për statusin e vendit kandidat sesa Kosova në këtë moment, duke e quajtur paradoksale që aplikimi i Kosovës të mbetet i paadresuar për tre vjet.
Në përmbyllje, ai shprehu dëshirën që samiti i ardhshëm të organizohet në Prishtinë./teve1.info/
