Kryeprokurori i Shtetit, Zejnulla Gashi, ka pritur në takim një delegacion të Departamentit të Thesarit të Shteteve të Bashkuara të Amerikës, të kryesuar nga Joseph W. Burke dhe Norman Richard Smith.
Sipas njoftimit zyrtar, në fokus të takimit ishte forcimi i bashkëpunimit ndërmjet institucioneve, me theks të veçantë në luftimin e pastrimit të parave, sekuestrimin dhe konfiskimin e pasurisë së paligjshme, si dhe hetimin e veprave penale financiare dhe formave të sofistikuara të kriminalitetit ekonomik.
Gjatë diskutimeve u trajtua edhe mundësia e ofrimit të ekspertizës dhe njohurive profesionale për prokurorët e shtetit, me qëllim të forcimit të kapaciteteve profesionale dhe institucionale në luftën kundër krimit financiar dhe ekonomik.
Përfaqësuesit e Departamentit të Thesarit të SHBA-së shprehën gatishmërinë për të mbështetur mekanizmat e krijuar nga Kryeprokurori i Shtetit, veçanërisht mekanizmin mbikëqyrës të punës së prokurorëve të shtetit.
Ndërkaq, kryeprokurori Zejnulla Gashi theksoi gatishmërinë për thellimin e bashkëpunimit me Departamentin e Thesarit amerikan, me synim rritjen e efikasitetit institucional, forcimin e sundimit të ligjit dhe avancimin e kapaciteteve profesionale të prokurorëve të shtetit.
Takimi synon të kontribuojë në forcimin e bashkëpunimit ndërinstitucional dhe në rritjen e kapaciteteve për parandalimin dhe luftimin e kriminalitetit financiar dhe ekonomik.
