Kryeministri në detyrë i Kosovës, Albin Kurti, të premten do të marrë pjesë në Samitin e Planit të Rritjes së Bashkimit Evropian, i cili po mbahet në Tiranë.
Sipas njoftimit të Zyrës së Kryeministrit, Kurti do të udhëtojë sot drejt kryeqytetit shqiptar, ku mbrëmjen e së enjtes do të marrë pjesë në Darkën e Liderëve, e organizuar në kuadër të samitit.
Plani i Rritjes për Ballkanin Perëndimor mbulon periudhën 2024–2027 dhe përfshin një paketë prej 6 miliardë eurosh, të miratuar nga Bashkimi Evropian në fund të vitit 2023. Qëllimi i tij është mbështetja e vendeve të rajonit për t’i përafruar ekonomitë e tyre me standardet evropiane.
Për të përfituar nga ky plan, vendet duhet të realizojnë reformat e kërkuara nga BE-ja, të cilat përfshijnë përmirësimin e sektorit privat, tranzicionin e gjelbër, digjitalizimin dhe reforma të tjera strukturore.
Nga kjo paketë financiare, Kosova mund të përfitojë mbi 880 milionë euro, prej të cilave rreth 250 milionë euro janë grante pa kthim, ndërsa pjesa tjetër jepet në formë kredie me kushte shumë të favorshme.
Kosova ka qenë ndër vendet e para në rajon që ka miratuar agjendën e reformave të BE-së, por procedurat për marrjen e fondeve mbeten të bllokuara, pasi nevojitet ratifikimi formal nga institucionet shtetërore – diçka që aktualisht është e pamundur për shkak të mungesës së Kuvendit funksional.
