Ushtria izraelite ka arrestuar gati 100 palestinezë në qytetin Beit Ummar, në pjesën veriore të Hebronit në Bregun Perëndimor të pushtuar, pasi fillimisht mbylli të gjitha hyrjet e qytetit të mërkurën herët.
Operacioni erdhi orë pasi që një kolon izraelit u vra dhe tre të tjerë u plagosën, në një therje me thikë në pjesën jugore të Bregut Perëndimor.
Sulmi u krye nga dy palestinezë , njëri prej të cilëve u qëllua për vdekje nga forcat izraelite.
Forcat izraelite sulmuan Beit Ummarin herët të mërkurën dhe bastisën dhjetëra shtëpi, përfshirë shtëpinë e familjes Sabarneh, duke dëmtuar përmbajtjen e saj, thanë dëshmitarët për Anadolu.
Ata thanë se ushtria nisi një fushatë të gjerë arrestimesh në qytet, duke ndaluar rreth 100 persona.
Sipas dëshmitarëve, ushtria e shndërroi stadiumin bashkiak në një vend të improvizuar për mbajtjen dhe marrjen në pyetje.
Videot që qarkullojnë në internet tregojnë ushtarë izraelitë duke shoqëruar palestinezët e lidhur brenda qytetit.
Ushtria izraelite ka përshkallëzuar sulmet e saj në Bregun Perëndimor që nga shpërthimi i luftës në Gaza në tetor 2023.
Më shumë se 1,076 palestinezë janë vrarë që atëherë dhe 10,700 të tjerë janë plagosur në sulmet e ushtrisë dhe kolonëve të paligjshëm në territorin e pushtuar. Gjithashtu, janë arrestuar më shumë se 20,500 persona.
