Shefi i Grupit Parlamentar të Aleancës, Besnik Tahiri, ka reaguar në Kuvendin e Kosovës ndaj deklaratave të deputetëve të Lëvizjes Vetëvendosje (LVV), të cilat, sipas tij, lidhin Ramush dhe Daut Haradinajn me personat e përfshirë në vrasjen e Arlinda Zekajt në Pejë.
Tahiri i ka kritikuar deputetët e LVV-së për atë që e cilësoi si përpjekje për të përfituar politikisht nga një tragjedi, duke theksuar se pretendimet nuk duhet të bëhen pa prova konkrete.
Ai iu drejtua deputetit të LVV-së, Taulantit, duke kundërshtuar referimet ndaj “të fortëve të Dukagjinit” dhe duke thënë se një fotografi apo një drekë nuk përbëjnë, në vetvete, dëshmi për përfshirje në veprimtari kriminale.
Tahiri tha se Ramush dhe Daut Haradinaj njihen në Dukagjin dhe kundërshtoi, sipas tij, përpjekjet për t’i lidhur me pretendime të pabazuara.
“Është e ulët që, në çfarëdo rrethane, pa pasur evidencë, secili prej nesh dhe prej jush të mundohet të përfitojë politikisht nga një tragjedi dhe një trup që ende nuk ka qenë në dhe. Këtu po ju drejtohem juve, kolegë të nderuar të LVV-së. Po i drejtohem Taulantit. Qysh ka mundësi, Taulant, me dalë e me lexu në foltore dhe me u sillë e përshcjellë rreth të fortëve të Dukagjinit? Për çka? Se dikush e paska bërë një foto? Dikush e paska ngrënë një drekë? Ju deputetë që jeni të Dukagjinit, ju e dini se kur t’i hyni në konak dikujt të Dukagjinit, është e rrallë që të mos të qesë çka ka dhe të dëshirojë të bëjë edhe një foto. Ne mund të ndodhë që edhe në familjet tona të kemi njerëz psikopatë. Me u çu me lidhë dhe me i pështjellë një deputet, familja e të cilit e njeh mirë se kush është Ramush e Daut Haradinaj, se ka punuar me ta. Kjo është e ulët. Mendoj se fiton një lajm, por beso se ke humbur shumë. Jam shumë i lumtur që nuk më ka dëgjuar Aleanca kur kam kërkuar që ty të ta japë votën për balotazh”, tha ai.
Tahiri kritikoi edhe deputeten Arjeta Fejza, duke iu referuar deklaratave të saj për një ish-kryeministër që, sipas saj, akuzohet për dhunë në familje. Ai vuri në pikëpyetje bazën e këtyre deklaratave, duke thënë se ato ishin mbështetur në informacione të dëgjuara në media.
Tahiri, ndërkaq, përmendi edhe fotografi që, sipas tij, mund të përdoren për të krijuar lidhje mes personave publikë dhe individëve të dyshuar për krime, duke theksuar se këto pretendime duhen trajtuar me kujdes.
“I drejtohem koleges deputete Arjeta Fejza. Beso, nuk munda me dëgju një grua, një vajzë që flet gjithë ditën për të drejtat e grave. Thoshte se në parlament ekziston një ish-kryeministër, dikush që akuzohet për dhunë në familje. E pyesin se kush është ai? A ka ndonjë padi? Ajo thotë se kam dëgjuar në media. A e dini se çka dëgjova unë në media për juve? E kam parë Xhelal Sveçlën me atë vrasësin. Albin Kurtin me Naim Murselin, që nuk e di a është e vërtetë apo gënjeshtër. Mos bëni kështu, se po bëni dëm substancial. Dukagjini e njeh se kush është Ramush dhe Daut Haradinaj. Sikurse e dinë se ka kriminelë dhe të pafytyrë që bëjnë një foto dhe thonë se unë e kam dhe ky më mbron”, potencoi ai./
