Ministri i Jashtëm i Polonisë tha të mërkurën se do të urdhërojë mbylljen e konsullatës së fundit ruse që ende vepron në vend, pasi autoritetet thanë se dy shtetas ukrainas që punojnë për Moskën dyshohen për shpërthimin e një linje hekurudhore në Poloni.
Agjencia polake e lajmeve PAP njoftoi se Radek Sikorski tha se e kishte paralajmëruar vazhdimisht Rusinë se prania e saj diplomatike dhe konsullore do të reduktohej më tej nëse nuk do të ndërpriste veprimet armiqësore kundër Polonisë.
“Lidhur me këtë, megjithëse nuk do të jetë përgjigjja jonë e plotë, kam vendosur të tërheq pëlqimin për funksionimin e konsullatës së fundit ruse në Gdansk”, tha ai. Ai shtoi se Rusia do të njoftohet zyrtarisht brenda disa orësh.
“Këtë herë nuk ishte vetëm një akt përmbysjeje, siç ka ndodhur më parë, por një akt terrori shtetëror pasi qëllimi i tij i qartë ishte të shkaktonte viktima njerëzore”, tha Sikorski. Mbyllja do ta lërë Rusinë vetëm me ambasadën e saj në Varshavë.
Në përgjigje, Moska do të “zvogëlojë praninë diplomatike dhe konsullore të Polonisë në Rusi”, citoi agjencia shtetërore e lajmeve RIA Novosti zëdhënësen e Ministrisë së Jashtme ruse, Maria Zakharova.
Të martën, Kryeministri i Polonisë, Donald Tusk i tha parlamentit polak se dy të dyshuarit kishin bashkëpunuar me shërbimet sekrete ruse për një kohë të gjatë, raporton AP.
Ai tha se identitetet e tyre ishin të njohura, por nuk mund të zbuloheshin për publikun për shkak të hetimit në vazhdim, dhe se dyshja tashmë ishte larguar nga Polonia, duke kaluar në Bjellorusi.
