Shefja e Grupit Parlamentar të LVV-së, Mimoza Kusari-Lila, në emisionin “Info Nata” në Tëvë1, ka folur për rëndësinë e dy seancave të së nesërmes në Kuvend, të planifikuara për ora 11:00 dhe 14:00.
Sipas saj, seanca e parë e ditës pritet të fokusohet në miratimin e marrëveshjeve të lidhura me buxhetin, ndërsa ajo e pasdites do t’i dedikohet votimit të mandatarit për kryeministër, Glauk Konjufca.
Kusari-Lila ka sqaruar se ky renditje e seancave nuk është rastësor, por i përcaktuar nga dinamika kushtetuese dhe procedurat që lidhen me votimin e qeverisë së re.
“Për arsye se në afatin kushtetues kemi arritur në ditët e fundit. Në rast se nuk ka sukses votimi i qeverisë me mandatarin Glauk Konjufca, atëherë automatikisht, siç e dini, Kuvendi shpërndahet dhe vendi shkon në zgjedhje. Ky proces merr 30 deri në 40 ditë për mbajtjen e zgjedhjeve, dhe më pas ballafaqohemi me verifikimin e kandidatëve dhe kontesteve zgjedhore që mund të paraqiten”, ka deklaruar Kusari-Lila.
E pyetur nëse shumica i ka votat për ta zgjedhur Glauk Konjufcën si kryeministër, Kusari-Lila ka thënë se janë bërë përpjekje intensive për të siguruar mbështetjen e nevojshme.
“Po, unë besoj se ne jemi përpjekur të sigurojmë votat. Kemi punuar që disa marrëveshje dhe procese të miratohen paraprakisht, në mënyrë që në rast të mungesës së suksesit në votimin e qeverisë Konjufca, të paktën të kemi garancë për miratimin e marrëveshjeve të rëndësishme, të cilat lidhen edhe me fonde që mund të humbin. Mbetet të shihet nesër. E di që si kryeministri Kurti ashtu edhe Konjufca janë kujdesur që kësaj radhe të kemi sukses”, ka thënë ajo.
Kusari-Lila ka paralajmëruar se ekziston rreziku real që seanca e paradites të mos mbahet, për shkak të qëndrimit të opozitës.
“Fatkeqësisht, siç po shihet, seanca e orës 11:00 nuk do të mbahet për shkak të qëndrimit të opozitës. Por ata kanë ende disa orë kohë për të reflektuar”, ka theksuar ajo.
Këto zhvillime vijnë në një moment kritik për skenën politike në vend, ndërsa e nesërmja pritet të jetë vendimtare për të ardhmen institucionale dhe buxhetore të Kosovës.
