Ndërmarrja Publike “Trainkos” njoftoi sot për dëmtimin e vagonëve të trenit, në Han të Elezit.
Lidhur me këtë rast, zëdhënësi i policisë për rajonin e Ferizajt, Kanun Veseli, ka bërë të ditur se kanë nisur hetimet.
Veseli njoftoi se policia është informuar nga një përgjegjës i Infrakos-it se persona të panjohur kishin shkruar grafite në dy vagona udhëtarësh.
“Më datë 15.11.2025, rreth orës 09:15, përgjegjësi i Infrakos-it ka njoftuar policinë se persona të panjohur kanë shkruar grafite në dy vagona të udhëtarëve, të cilët ndodhen në stacionin e Trenit në Han të Elezit që nga dhjetori 2024 dhe janë pronë e kompanisë ‘TRAINKOS’”, tha Veseli .
Ai bëri të ditur se pas njoftimit, është kontaktuar prokurori i shtetit dhe se rasti është cilësuar si “asgjësim apo dëmtim i pasurisë”.
Veseli njoftoi se hetimet për këtë ngjarje po kryhen nga Njësia e Hetimeve e Policisë.
