Ministrat e jashtëm të vendeve të G7-ës dënuan ashpër të mërkurën atë që e përshkruan si sulme “të motivuara etnikisht” nga Forcat paraushtarake të Mbështetjes së Shpejtë (RSF) të Sudanit ndaj civilëve të paarmatosur dhe punonjësve të ndihmës në El-Fasher dhe Kordofan të Veriut.
Në një deklaratë të përbashkët pas një takimi dy-ditor në Niagara të Kanadasë, diplomatët më të lartë të Kanadasë, Francës, Gjermanisë, Italisë, Japonisë, Mbretërisë së Bashkuar dhe SHBA-së – së bashku me Përfaqësuesen e Lartë të Bashkimit Evropian – shprehën keqardhje për “ndikimin shkatërrues të kësaj lufte mbi civilët, përfshirë urinë që ka çuar në krizën më të madhe humanitare në botë”.
“Ne e dënojmë pa mëdyshje dhunën seksuale. Ne u kërkuam Forcave të Mbështetjes së Shpejtë (RSF) dhe Forcave të Armatosura Sudaneze (SAF) të respektojnë të drejtat e njeriut, të ulin tensionet, të angazhohen për një armëpushim të menjëhershëm dhe të përhershëm dhe të sigurojnë kalimin e shpejtë dhe të papenguar të ndihmës humanitare”, thuhet në deklaratë, citon Anadolu.
Ministrat shprehën gjithashtu mbështetjen e tyre për “përpjekjet diplomatike që janë duke u zhvilluar për të rivendosur paqen dhe sigurinë” dhe u bënë thirrje aktorëve të jashtëm të kontribuojnë në këto përpjekje.
Kjo ndodhi ndërsa OKB-ja paralajmëroi se situata në Sudan po përkeqësohet për civilët, ndërsa grupet e ndihmës tregojnë se qasja në zonat e prekura mbetet shumë e kufizuar nga konflikti.
Konflikti i përgjakshëm midis ushtrisë dhe RSF-së, i cili filloi në prill të vitit 2023, ka vrarë të paktën 40,000 njerëz dhe ka zhvendosur rreth 12 milionë, sipas Organizatës Botërore të Shëndetësisë.
Muajin e kaluar, RSF pushtoi kryeqytetin e shtetit të Darfurit të Veriut, El-Fasher, dhe u akuzua për masakra. Grupi kontrollon të pesë shtetet e Darfurit nga 18 shtetet e Sudanit, ndërsa ushtria mban shumicën e 13 shteteve të mbetura, përfshirë Khartumin.
Darfuri përbën rreth një të pestën e territorit të Sudanit, por shumica e 50 milionë banorëve të vendit jetojnë në zona të kontrolluara nga ushtria.
