Këngëtarja kosovare e famshme ndërkombëtarisht, Dua Lipa, ka kontribuar ndjeshëm në rritjen e ekonomisë së Britanisë së Madhe, duke sjellë rreth 8 miliardë funte vitin e kaluar.
Ylli i popit, e njohur për hite si “New Rules” dhe “Levitating”, renditet ndër artistet më të suksesshme financiarisht në industrinë muzikore, duke ndihmuar shtetin të rrisë të ardhurat me 5% në krahasim me vitin e kaluar.
Albumi i saj i fundit, “Radical Optimism”, ka debutuar në vendin e parë në toplistat muzikore, dhe turnetë promovuese në qytete si Singapor, Japonia dhe Malajzia kanë rritur eksportet muzikore të Britanisë në një total prej 4.8 miliardë funte.
Pjesëmarrës në këtë rritje janë dhe turnetë e artistëve të tjerë të njohur si Taylor Swift, Liam Gallagher, grupi “Take That” dhe Bruce Springsteen, ndërsa Charli XCX ka arritur sukses të madh me albumin e saj të fundit, “Brat”.
Në total, industrisë së muzikës në Britani iu grumbulluan 8 miliardë funte, duke shënuar një rritje krahasuar me 7.6 miliardë funtet e vitit 2023.
Sipas raportit vjetor të organizatës “UK Music”, 1.49 miliardë funte erdhën nga shitjet fizike, shkarkimet dhe transmetimet online.
Industria muzikore në Britani ka një ndikim të madh në punësimin e rreth 220,000 individëve, por raporti gjithashtu thekson se, pas një periudhe të fortë rritjeje pas pandemisë, ritmi i rritjes ka filluar të ngadalësohet.
Tom Kiehl, shefi ekzekutiv i “UK Music”, ka mirëpritur rritjen e të ardhurave, por ka paralajmëruar se sektori përballet me disa sfida.
Ai ka theksuar se, megjithë rritjen e paspandemisë, rënia e fitimeve mund të jetë një problem afatgjatë nëse nuk adresohen disa çështje themelore.
Dua Lipa, tashmë 30 vjeçe, është aktualisht në turne në Argjentinë.
Së fundmi, ajo ka ndarë një foto me motrën e saj, Rinën, gjatë një ndeshjeje futbolli mes ekipit “River Plates” dhe “Boca Juniors” në Buenos Aires, pas dy koncerteve të saj të suksesshme në stadiumin e qytetit.
