Kapiteni i Kombëtares së Shqipërisë, Berat Gjimshiti ka thënë se “kuqezinjtë” nuk kanë opsion tjetër përveç fitores kundër Andorrës.
Kjo ndeshje luhet të enjten prej orës 20:45 dhe i takon xhiros së parafundit të Grupit K kualifikues për Botërorin 2026.
Gjimshiti u paraqit në konferencën për shtyp përkrah selektorit Sylvinho, i cili gjithashtu shprehu optimizmin e tij para duelit me Andorrën.
SIpas Gjimshitit, Shqipëria duhet të japë maksimumin në fushë për të marrë 3 pikët.
“Kemi ardhur këtu për një qëllim, që të marrim 3 pikët. Na nevojiten për objektivin. E kemi parë kundërshtarin, në ndeshjet ku Serbinë dhe Anglinë i kanë vendosur në vështirësi. Ne do të bëjmë futbollin tonë. Do futemi në fushë për 3 pikët. Do e respektojmë kundërshtarin, por duhet të jemi të fortë për të përballuar gjithçka”, është shprehur Gjimshiti, i cili ka thënë se ndihet me krenar për 300 ndeshjet e luajtura me fanellën e Atalantas.
Ai ka insistuar se nuk po mendojnë për duelin e së dielës me Anglinë në Tiranë, duke thënë se përballja e rëndësishme është kjo pikërisht kundër Andorrës.
“Fitorja është gjithmonë e rëndësishme. Tani ndeshja më e rëndësishme është ndaj Andorrës. Ato momentet kur të jemi mirë, duhet të japim maksimumin për 3 pikët. Jemi gati për sfidën me Andorën. Gjithçka është e mundur në futboll. Çdo gjë është e arritshme, pse jo dhe ta provosh. Ajo që më vjen tani ndërmend, është se mundësitë që kemi me lojtarët me shumë cilësi, kemi lojtarë të rinj me shumë cilësi që i janë bashkuar ekipit tonë. Kualiteti është rritur në disa aspekte. Grupi bën të mundur gjithçka dhe kjo është gjithçka që kemi ne”, tha Gjimshiti.
