Partitë opozitare nuk kanë dhënë asnjë sinjal se do ta mbështesin Glauk Konjufcën për postin e kryeministrit.
Nga Partia Demokratike e Kosovës është përsëritur qëndrimi se nuk do të votojnë për mandatarin e propozuar nga Lëvizja Vetëvendosje.
Deputeti i PDK-së, Artan Behrami, tha se në rrethanat aktuale politike vendi duhet të shkojë në zgjedhje të reja.
“Partia Demokratike e Kosovës nuk ka ndryshuar qëndrim dhe nuk ka votë për Lëvizjen Vetëvendosje. Në këto rrethana aktuale, konsideroj se vendi duhet të shkojë sërish në zgjedhje të reja”, ka thënë ai.
Behrami e akuzoi Kurtin se e ka bllokuar qëllimisht vendin.
“Kurti qëllimisht e ka bllokuar vendin dhe ne nuk do të bëhemi pjesë e lojërave të tij”, u shpreh Bajrami.
As Lidhja Demokratike e Kosovës nuk ka shprehur gatishmëri për ta mbështetur Konjufcën.
Madje, kryetari i LDK-së, Lumir Abdixhiku, e ka quajtur “shfaqje teatrale” propozimin e Vetëvendosjes.
Zgjedhje të parakohshme po kërkon edhe Aleanca për Ardhmërinë e Kosovës.
“E kemi thënë disa herë se Aleanca për Ardhmërinë e Kosovës nuk ka vota për z. Konjufca dhe vendi duhet të shkojë në zgjedhje”, ka thënë Brahimaj.
Glauk Konjufca ka afat deri më 19 nëntor për të paraqitur përbërjen e re qeveritare para Kuvendit.
Konjufca kishte kërkuar bashkëpunim nga opozita për krijimin e qeverisë, por jo koalicion me ta.
