Trupat e 19 personave u gjetën në vendin e rrëzimit të aeroplanit ushtarak turk të mallrave të martën përgjatë kufirit Gjeorgji-Azerbajxhan dhe përpjekjet e kërkimit janë duke vazhduar për viktimën e mbetur, tha presidenti turk Rexhep Tajip Erdogan.
Duke folur të mërkurën në një takim të krerëve të krahinave të Partisë për Drejtësi dhe Zhvillim (AK) në kryeqytetin Ankara, Erdogan tha se kutia e zezë e avionit është gjetur dhe se kanë filluar hetimet.
“Puna e vazhdueshme në vendin e rrëzimit po monitorohet nga afër dhe të gjitha hetimet e nevojshme do të bëhen me përpikëri për të sqaruar çdo aspekt të incidentit”, shtoi ai, duke vënë në dukje se kombi mund të jetë i sigurt se, së bashku me Turqinë, të gjitha burimet e Gjeorgjisë dhe Azerbajxhanit janë mobilizuar për heronjtë tanë.
Presidenti vuri në dukje gjithashtu se do të vazhdojnë përditësimet e rregullta për publikun mbi rrëzimin e avionit nga Ministria e Mbrojtjes Kombëtare e Turqisë dhe Drejtoria e Komunikacionit, ka cituar agjencia Anadolu.
Ai i bëri thirrje kombit të jetë i kujdesshëm ndaj dezinformatave në lidhje me rrëzimin e avionit dhe të mos i shpërblejë ata “që përkulen në politikë të ndyrë”.
Erdogan përkujtoi ushtarët e rënë duke lexuar emrat e tyre dhe duke u lutur për ta.
Ergodan vuri në dukje se mjetet ajrore pa pilot u vendosën në koordinim me autoritetet gjeorgjiane për të marrë pamje nga zona.
Ai tha se vendi i rrëzimit ishte i rrethuar për arsye sigurie dhe mbrëmë, “ekipi ynë i hetimit të rrëzimit prej 46 anëtarësh u dërgua në zonë”.
“Autoritetet gjeorgjiane kanë ofruar të gjithë mbështetjen dhe bashkëpunimin e nevojshëm në nivelin më të lartë, ndërsa vëllezërit tanë azerbajxhanas kanë ofruar gjithashtu çdo formë ndihme”, shtoi ai.
Erdogan shprehu ngushëllime familjeve të dëshmorëve, Forcave të Armatosura Turke dhe kombit, dhe falënderoi vendet mike dhe vëllazërore që ndanë pikëllimin e Turqisë.
