Analisti politik, Artan Alijaj, ka vlerësuar se i mandatuari për kryeministër të Kosovës, Glauk Konjufca, nuk ka 61 votat e nevojshme në Kuvend për formimin e qeverisë së re.
Sipas Aliajt, presidentja Vjosa Osmani duhet të kishte bazuar vendimin e saj në votat që një kandidat mund t’i siguronte për t’u zgjedhur kryeministër.
“Presidentja duhet të bazohet te votat që një kandidat mund t’i siguronte Automatikisht, pas zgjedhjeve, presidentja natyrisht ia ofron mandatin e parë partisë fituese, por nëse mandatari dështon, i dyti duhet të jetë një individ që mund të dëshmojë se ka mbi 61 vota në Kuvendin e Kosovës. Në këtë vend, e dimë të gjithë, edhe presidentja, se Konjufca nuk ka 61 vota, por vetëm 56 ose eventualisht 57″, ka thënë Aliaj.
Ai ka theksuar se udhëheqësit e partive opozitare i kanë bërë të qartë presidentes se nuk do ta përkrahin asnjë kandidat të Vetëvendosjes dhe se synojnë zgjedhje të reja.
“Presidentja tha se “ka gjasa”, por nuk ka, sepse të gjithë liderët e partive i kanë bërë të qartë se nuk do ta përkrahin asnjë kandidat të qeverisjes Vetëvendosje dhe duan të shkojnë në zgjedhje. Kjo ka qenë shumë e qartë. Në këtë rast, mendoj se nëse presidentja do të ishte plotësisht objektive, automatikisht do të bënte thirrje për zgjedhje dhe do të shfrytëzonte fuqinë që ia garanton Kushtetuta për t’i dhënë mandatin e dytë në kërkim të një shumice që e dimë se nuk do të sigurohet. Kështu, ky hap është vetëm një blerje kohe”, ka përfunduar ai.
