I dërguari i posaçëm amerikan për Kosovën, Christopher Hill, ka deklaruar se kontakti i tij i parë me Ushtrinë Çlirimtare të Kosovës ka ndodhur në verën e vitit 1998, në Tiranë të Shqipërisë.
Gjatë dëshmisë së tij, Hill tha se për një periudhë të gjatë kishte tentuar të gjente persona që mund të përfaqësonin zyrtarisht UÇK-në, por pa sukses.
“Derisa po punoja me stafin tim dhe të tjerë, duhej të gjenim një zyrtar apo grup zyrtarësh të UÇK-së me të cilët mund të flisnim. Kam punuar për një kohë në këtë drejtim pa pasur sukses dhe arritëm në përfundim se nuk kishte një udhëheqje të tillë. Bëhej fjalë për një grup njerëzish në nivel vendor – që ishte përshkrim shumë më i saktë i asaj me të cilën po merreshim ne,” tha Hill, shkruan Tëvë1.
Ai shtoi se në Tiranë kishte takuar një person që i ishte prezantuar si drejtues i UÇK-së, por që më pas rezultoi se nuk mund të fliste në emër të saj.
“Në Tiranë takuam dikë që na ishte përshkruar si kreu i UÇK-së. Unë dhe kolegët e mi erdhëm në përfundim se ai vepronte brenda lëvizjes, por nuk mund të fliste në emër të saj. Ne vazhduam punën për të gjetur njerëz që mund të flisnin si përfaqësues të saj,” deklaroi diplomati amerikan.
Hill tha se gjatë verës dhe vjeshtës së vitit 1998 kishte shkuar edhe në Likoc, në përpjekje për të krijuar kontakte të drejtpërdrejta me strukturat e UÇK-së.
Në vijim të dëshmisë, ai pranoi se nuk e mbante mend emrin e personit të parë që kishte takuar nga UÇK-ja, por e konfirmoi pas pyetjes së avokatit mbrojtës.
“Nuk më kujtohej emri i personit të parë me të cilin isha takuar, por kur avokati më pyeti nëse ishte Xhavit Haliti, u përgjigja ‘po’,” tha Hill./teve1.info/
