Politologu Avdi Smajljaj ka komentuar garën zgjedhore në Mitrovicën e Jugut dhe lidhjen që bëhet mes qeverisjes lokale dhe zhvillimeve në veri të vendit.
Sipas tij, ruajtja e arritjeve të qeverisë në veri nuk varet domosdoshmërisht nga partia që drejton komunën e jugut.
Ai kujtoi se shumë prej këtyre arritjeve janë realizuar në kohën kur Mitrovica e Jugut udhëhiqej nga Partia Demokratike e Kosovës (PDK), jo nga Lëvizja Vetëvendosje (VV).
“A është e domosdoshme që të fitojë ose të ndërrohet qeverisja lokale në Mitrovicë për t’i ruajtur të arriturat në veri? Ne e dimë që këto të arritura të qeverisë së udhëhequr nga LVV-ja janë bërë në kohën kur Mitrovica e Jugut ka qenë nën drejtimin e PDK-së. Do të thotë, s’është patjetër që në nivelin lokal të jetë dikush nga VV-ja që të mbahen këto rezultate”, tha Smajljaj në emisionin “Këndi i Debati” në Tëvë1.
Ai shtoi se më e rëndësishme është cilësia e qeverisjes lokale sesa përkatësia partiake.
“Mendoj që më vështirë ka qenë me i arrit këto suksese sesa me i ruajtur. Prandaj, nuk e kisha lidh domosdoshmërinë me partinë, por me një qeverisje më të mirë”, theksoi politologu. /teve1.info/
