Javën e kaluar, Samsung prezantoi telefonin e parë inteligjent me tre palosje në panairin K-Tech 2025, pajisje kjo që ende nuk ka një emër zyrtar dhe ishte vendosur pas një ekrani prej xhamit.
Tani, SBS News dhe Omokgyo Electronics kanë publikuar një video që jep një pamje më të qartë të pajisjes nga kënde të ndryshme.
Në video shihet se telefoni ka bosht të dyfishtë, të vendosur në të dyja anët e ekranit kur ai është i palosur, ndërsa hinge në anën e majtë duket më e gjerë se ajo në anën e djathtë.
Pasi hapet, ekrani i jashtëm lëviz në anën e djathtë, ndërsa dy panelët e mbetur zënë hapësirën pranë tij. Përdoruesi merr një diagonale prej 10 inç kur telefoni është plotësisht i hapur, dhe pajisja duket jashtëzakonisht e hollë kur shikohet nga ana.
Emri që po qarkullon për këtë model është Galaxy Z TriFold, i cili mendohet se do të ketë edhe një ekran të jashtëm në pjesën e pasme, me tre kamera dhe flash LED, që ngjajnë me ato të Galaxy Z Fold7.
Telefoni përfshin gjithashtu butonin “power” dhe butonat për kontrollin e volumit në anën e djathtë, ndërsa butoni “power” duket se ka të integruar skanerin për gjurmët e gishtërinjve, njësoj si tek modeli Fold7.
Samsung ende nuk ka ndarë specifikimet e detajuara të pajisjes, dhe për momentin nuk dihen dimensionet e sakta të saj.
