Kryetari i Partisë Demokratike të Kosovës, Memli Krasniqi, ka reaguar ashpër ndaj miratimit të buxhetit për vitin 2026 nga Qeveria në detyrë, duke e cilësuar si tentativë mashtrimi elektoral për të blerë vota në prag të zgjedhjeve.
Sipas Krasniqit, qytetarët e Kosovës nuk mund të rikthejnë besimin te një qeveri që nuk ka përmbushur premtimet e pesë viteve të fundit, transmeton lajmi.net.
“Thesi i mashtrimeve të një ‘babadimri’ që kurrë s’erdhi për qytetarët e Kosovës, sado që premtoi çdo vit për pesë vjet, s’mundet me e rikthy besimin e humbur te qytetarët e as nuk mund të arrijë qëllimin e blerjës së votës për balotazh dhe për zgjedhje parlamentare,” ka shkruar ai.
Krasniqi thekson se të gjitha premtimet e sotme të qeverisë do të realizohen vetëm nga qeveria e ardhshme, pa Albin Kurtin dhe Vetëvendosjen.
“Krejt ato që sot u thanë në mbledhjen e fundit të kësaj qeverie, e që s’u bëjnë pesë vjet me radhë, do të bëhen: më mirë, më shumë e më shpejt, por me qeverinë e ardhshme, pa Albin Kurtin e pa Vetëvendosjen. Mashtrimi elektoral nuk kalon. Uji i turbullt s’pihet dy herë!”.
