Në Gjykatën Themelore të Prishtinës është dashur të mbahet sot seanca gjyqësore ndaj deputetëve të Lëvizjes Vetëvendosje, Fitore Pacolli dhe Sali Zyba, si dhe ministrit në detyrë të Punëve të Brendshme, Xhelal Sveçla, për rastin e hedhjes së gazit lotsjellës në Kuvendin e Kosovës në mars të vitit 2018.
Në këtë seancë morën pjesë vetëm Fitore Pacolli dhe Sali Zyba, ndërsa ministri Xhelal Sveçla mungoi, pavarësisht urdhëresës së gjykatës për sjellje me detyrim. Për shkak të mungesës së tij, seanca është shtyrë për 16 janar 2026.
Avokati i Sveçlës sqaroi arsyen e mungesës së klientit të tij, duke thënë se ministri ndodhet jashtë vendit për shkak të angazhimeve zyrtare.
“Sipas informatave që kam, ministri gjendet në udhëtim zyrtar,” deklaroi avokati i Sveçlës gjatë seancës, duke theksuar se mungesa e tij nuk ishte me qëllim shmangie nga procesi gjyqësor.
Urdhëresa për sjellje me detyrim ishte lëshuar nga gjyqtari Sabit Sadikaj më 18 shtator 2025, pasi të tre të akuzuarit kishin munguar në seancën e mëparshme të 16 shtatorit. Sipas gjykatës, zbatimi i kësaj urdhërese ishte përgjegjësi e Policisë së Kosovës për të siguruar praninë e të akuzuarve.
Aktakuza ndaj Sveçlës, Pacollit, Zybës dhe ish-deputetes së LDK-së, Drita Millaku, ishte ngritur më 26 korrik 2019 nga prokurori Eset Rama.
Sipas Prokurorisë, hedhja e gazit lotsjellës gjatë seancës plenare të marsit 2018 kishte penguar zhvillimin normal të punimeve në Kuvend dhe kishte detyruar deputetët të lironin sallën.
“Me këto veprime, të akuzuarit kanë penguar personat zyrtarë në kryerjen e detyrave të tyre zyrtare,” thuhet në aktakuzë.
Seanca e radhës pritet të zhvillohet më 16 janar 2026, ku gjykata do të vazhdojë me dëgjimin e deklaratave të të akuzuarve dhe shqyrtimin e provave.
