Mbledhja e Kryesisë së Kuvendit të Kosovës për të diskutuar buxhetin në tri komuna Prishtinë, Zubin Potok dhe Gjilan ka përfunduar, ndërsa pas takimit ka folur nënkryetarja e Kuvendit nga radhët e PDK-së, Vlora Çitaku.
Ajo ka theksuar se Kosova ndodhet në krizë dhe ka nevojë urgjente për institucione funksionale.
“Sikurse nuk mund t’i lejojmë vetës që të merremi me zgjidhje të pjesshme, Kosova është në krizë dhe ka nevojë për institucione. Takimi tek presidentja është nesër – më mirë vonë se kurrë – dhe besoj se liderët politik aty do të konfirmojnë nëse ka shumicë të re parlamentare apo do të shkojmë në zgjedhje të reja,” ka thënë Çitaku.
Ajo ka shtuar se Kosova nuk ka kohë për të humbur dhe se Kuvendi aktual nuk po arrin të formojë shumicë të re parlamentare.
“Është e qartë që ky Kuvend nuk po arrin të formojë shumicë të re. Nuk kemi nevojë për taktizime – vendi ka nevojë për institucione. Duhet të shkojmë në zgjedhje dhe më pas të ballafaqohemi me sfidat e mëdha që i ka qytetari i Kosovës. Tash e sa muaj flasim për procedura formale, e nuk flasim për hallet reale të qytetarëve,” ka shtuar Çitaku.
