Ministri i Punëve të Jashtme i Sirisë, Asaad Hassan Al-Shaibani, tha se me mbështetjen e Türkiyes, Siria njeh Kosovën si shtet të pavarur.
Në një postim në platformën sociale të kompanisë amerikane X, kryediplomati sirian ndau lajmin e njohjes së pavarësisë së Kosovës.
“Nën patronazhin e Arabisë Saudite dhe me mbështetjen e Türkiyes, Republika Arabe Siriane njofton njohjen e Republikës së Kosovës si shtet të pavarur, duke riafirmuar respektin për sovranitetin dhe të drejtën e popujve për vetëvendosje”, shkroi ai.
Shaibani theksoi se Damasku pohon respektin e tij për vullnetin dhe aspiratat e popullit të Kosovës dhe pret me padurim zhvillimin e marrëdhënieve dypalëshe midis Damaskut dhe Prishtinës në një mënyrë që promovon stabilitetin dhe respektin e ndërsjellë midis kombeve.
Me njohjen e Sirisë, tani Kosova njihet nga 120 shtete të botës.
