Në mesin e rreth 162 mijë pensionistëve në Kosovë është edhe ky 76-vjeçar.
Por, që të mos i ndalohet pensioni mujor që merr, Latif Alshiqit i duhet që çdo gjashtë muaj të lajmërohet në Zyrën Pensionale.
I moshuari thotë se kjo po i paraqet vështirësi.
“Që nuk vijmë na humbin ato pare dhe e drejta për to se nuk je ardh me kohë edhe ajo është shume e keqe. Më ka humbur ai kartoni mua e sot erdha kisha pas edhe tri javë kohë më dha një letër më shkroi prapë. Komunikacioni shumë i vështirë me marr taksi po kushton pare po duhet diqysh me ardh deri te shkojmë të shtëpia dy dënime i marrim, po çka me bo po duhet se ligji është ligj”, thotë Latif Alshiqi – pensionist.
Ligjin po përpiqet ta zbatojë edhe pensionistja Hazbije Latifi.
E njëjta thotë se për personat që nuk mund të lajmërohen në afatin e caktuar është mirë të bëhet një zgjidhje.
“U lajmërova, asgjë nuk më thanë në rregull është krejt çdo ditë po vjen e më rregull. Çdo gjashtë muaj vij gjithmonë me kohë. Për mua nuk ka problem a për tjerët që nuk munden mirë është me ju shkua në shtëpi me ju marr shënimet. Unë për vete ende po mundem me ec e po kam qejf me dal pak e me ec”, thotë ajo.
E për këtë çështje, rreth pesë ditë më parë, në Gjykatën Supreme u dorëzua një padi.
Nga Qendra për Raste Gjyqësore Strategjike (CSL) njoftuan se kjo padi ka për qëllim shfuqizimin e Udhëzimit Administrativ për procedurat e lajmërimit, suspendimin nga pagesa dhe kthimin e mjeteve në rastet e keqpërdorimit të pensioneve.
“Qendra po synon të bëhet zë i të gjithë pensionistëve për një padrejtësi që po ju bëhet tash e dhjetë vite një kategorie kaq të ndjeshme të shoqërisë. Ne, vlerësojmë se një vendim pozitiv i gjykatës do të vë në pah se shteti për këto dhjetë vite ka bërë padrejtësi të madh ndaj pensionistëve duke i ndërprerë pensionet për ata që nuk kanë mundur të lajmërohen brenda afatit ligjorë dhe duke mos ua njohur të drejtën për kompensim retroaktiv”, shprehet Liridon Salihu.
Nga CSL treguan edhe për masat që kanë rekomanduar për të lehtësuar procedurën e lajmërimit të pensionistëve.
“Ne i kemi sugjeruar dy masa; e para ka të bëjë që ekipet mobile në kuadër të Ministrisë së Financave Punës dhe Transfereve të bëjnë vizita më të shpeshta tek pensionistet në rastet kur ata nuk mund të lajmërohen në afatin prej gjashtë muajsh dhe e dyta është që të krijohet një linjë pa pagesë ku pensionistet mund të kërkojnë që ata të verifikohen për shkak të pamundësive për të dal ose për tu lajmëruan në Zyrat Pensionale”, thotë Salihu.
Televizioni ka dërguar pyetje edhe në Ministrinë e Financave nëse do të bëjë plotësim ndryshimin e këtij Udhëzimi administrativ, por nga të njëjtit nuk ka pranuar përgjigje deri në publikimin e kronikës.
