Skuadra e basketbollit Peja do ta zhvillojë sonte ndeshjen e saj të tretë në kuadër të Ligës së Evropës Veriore, ENBL, ku do të kërkojë fitoren e parë sezonale.
Të martën mbrëma, nga ora 19:30, në palestrën “Karagaqi”, verdhezinjtë do të jenë nikoqirë të ekipit bullgar Spartak Pleven, në një përballje që pritet të jet e fortë.
Pas dy ndeshjeve të para jashtë shtëpie, ku Peja pësoi humbje nga Riga Zellit 72:83 e po ashtu edhe nga Dubrava e Kroacisë 98:83, verdhezinjtë do të mundohet që ta shfrytëzojnë avantazhin e terenit dhe ta arrijë fitoren e parë në ENBL.
Kjo do të jetë gjithashtu ndeshja e parë e Pejës në shtëpi në kuadër të ENBL-së, pasi palestra “Karagaqi” deri tani ka qenë e pamundur për përdorim për shkak të angazhimit të Komisionit Qendror të Zgjedhjeve gjatë procesit zgjedhor.
Sa i përket përbërjes, Gibson do të ketë të gjithë lojtarët në dispozicion, pa asnjë mungesë në roster, çka e rrit konkurrencën dhe optimizmin brenda skuadrës.
Ndërkohë, forma e Pejës në Superligën e Kosovës është pozitive, ekipi ka një bilanc perfekt prej tre fitoreve në po aq ndeshje, duke dëshmuar stabilitet dhe nivel të lartë loje në garat vendore.
Pos Pejës që është debutuese në ENBL, po paraqitet dhe skuadra e Sigal Prishtinës.
