Ramadani pas barazimit me Omonian, pret fitore në Irlandë

Trajneri i Dritës, Zekirija Ramadani, ka thënë se lojtarët e tij kanë bërë gjithçka në fushë për të arritur fitore kundër Omonias.

Por ai beson se Drita do ta realizojë shumë shpejt fitoren e parë në Ligën e Konferencës, duke thënë se në xhiron tjetër ndaj Shelbournet synojnë pikët e plota.

“Ne bëmë gjithçka për të fituar ndeshjen. Kaluam në avantazh, por ishte një moment që pësuam gol. Unë mendoj se kemi bërë paraqitje të mirë, por pash ekipin e mërzitur sepse kishim avantazhin dhe kishim mundësi të ruajmë këtë epërsi deri në fund. Është një ecuri e mirë, uroj të jetë e treta e vërteta – fitorja. Ne bëjmë gjithçka për të arritur deri te fitorja. Jam i bindur se këta lojtarë do të arrijnë deri te fitorja. Ndoshta do të arrihet në Irlandë”, ka thënë Ramadani pas ndeshjes.

Trajneri shkupjan ka folur edhe për përballjen që Drita do ta ketë kundër Shkëndijës së Tetovës, në kuadër të ligës në Ligën e Konferencës.

Ndeshja Drita – Shkëndija do të zhvillohet më 27 nëntor, një ditë para festës së 28 Nëntorit.

“Me qëllim nuk e përmenda këtë ndeshje, por ajo përballje do të jetë festë, pasi bëhet fjalë për ndeshjen që luhet një ditë para ditës së flamurit. Uroj të kalojnë mirë shikuesit, dhe ne skuadrat në fushë të tregojmë paraqitje të mirë”, ka thënë Ramadani.