Në Gjykatën Themelore të Prizrenit, është mbajtur seanca gjyqësore për vrasjen e 26 vjeçarit Auron Thaqi.
Thaqi, 26 vjeçar, ishte therrur me thikë në korrikun e vitit 2024, dhe më pas nuk u kishte mbijetuar plagëve, duke ndërruar jetë në QKUK.
Të akuzuar janë shtetasi turk, Enes Ay dhe Hajrullah Bërçani, të cilët në seancë u sollën duarlidhur.
Enes Ay akuzohet për lëndim të rëndë trupor, kurse Hajrullah Bërçanin për mosdhënie të ndihmës dhe moslajmërim të veprës penale.
Në këtë seancë dëshmoi specialistja e mjekësisë ligjore, Bergita Curri.
Ajo tregoi për plagët që kishte marrë Thaqi.
“Nga të gjeturat gjatë ekzamiminit të trupit në autopsi ku përveç dëmtimit në regjionin femural të djathtë, është evidentuar edhe një plagë shpuese në pjesën e sipërme të shpatullës së majtë. Nga ekzaminimi i organeve të brendshme dhe vitale nuk është gjetë asnjë shkaktar tjetër përveç gjakderdhjes dhe shokut hemoragjik”, tha ajo.
Ky informacion, se Auroni kishte dy plagë në trup, për nënën e tij ishte i panjohur deri më sot.
Esmarije Gashi, dyshon se kjo është fshehur qëllimshëm.
Tutje në dëshminë e saj, specialistja e mjekësisë ligjore tregoi se nga dy plagët e marra, fatale për Auronin ishte plaga në këmbë.
“Relevante është koha nga shkaktimit të plagëve dhe deri tek arritja në Spitalin e Prizrenit ku u është qepë plaga se ajo është periudha ku gjakderdhja ka qenë duke vazhdu. Në momentin kur është qepë arteria femurale, është ndalë gjakderdhja. Por nuk është arrit rikthimi i funksioneve vitale sepse edhe vet Spitali i Prizrenit e ka konstatuar që gjendja ka qenë kritike gjatë tërë kohës. Plaga vdekjeprurëse ka qenë plaga në regjionin e përparmë të kërdhokullës së djathtë”, tha specialistja e mjekësisë ligjore.
Nga të dhënat e këtij rasti, specialistja e mjekësisë ligjore përjashtoi mundësinë që vdekja e Auron Thaqit të ketë ardhur nga pakujdesia e mjekëve.
“Në rastin konkret nuk janë gjëtur elemente të neglizhencës mjekësore të cilat do të çonin në vdekjen e pacientit”, u shpreh Curri.
Sipas ekspertizës së autopsisë, vdekja e Auronit erdhi si pasojë e gjakderdhjes dhe ciklit të ndryshimeve fiziologjike që ka pamundesuar rikthimin e funksionit të organeve vitale.
“Arsyeja pse ka ardhë deri tek vdekja është dinamika e cila është shkaktuar në organizmin e personit, humbjes së gjakut, e cila konsideroj se ka qenë e konsiderueshme pasi edhe nëse ekipet mjekësore të ishin pranë tij dhe ta bënin intervenimin kirurgjik brenda mintuash, llogaritet që diku deri në 15% e vëllimit të përgjithshëm i gjakut do të humbte brenda 2-3 minutash”, tha Curri.
Auron Thaqi pas therrjes me thikë, dyshohet ishte hedhur nga një veturë në lëvizje.
