Ditën e dielë, u zhvilluan tre takime interesante në Superligën e Kosovës në basketboll, që i takojnë xhiros së dytë.
Në takimet e zhvilluara dje, Peja e mposhti Golden Eagle Yllin, Bashkimi me përvojë triumfoi ndaj Rahovecit, ndërsa Trepça me lehtësi e kaloi Vëllaznimin.
Xhiroja e dytë e Superligës do të përmbyllet sonte me një duel të veçantë dhe me karakter lokal, ku do të përballen dy skuadra nga kryeqyteti: Sigal Prishtina dhe Bora.
Sigal Prishtina, rekord-kampionja e basketbollit kosovar, ka hyrë fuqishëm në këtë sezon.
Në xhiron e parë, prishtinasit triumfuan ndaj Golden Eagle Yllit, duke dhënë sinjale të qarta se synojnë rikthimin në majat e basketbollit kosovar.
Në anën tjetër, Bora, që e nisi sezonin me një humbje surprizë ndaj Rahovecit, është në kërkim të fitores së parë.
Edhe pse skuadër e re në elitë, Bora ka treguar potencial dhe dëshirë për t’u përmirësuar, dhe përballja ndaj Sigal Prishtinës do të jetë një test i rëndësishëm për ambiciet e tyre.
Sezonin e kaluar, sfidat mes këtyre dy skuadrave ishin mjaft të luftuara dhe emocionuese, me ndeshje që shpesh u vendosën në minutat e fundit.
Ky takim zhvillohet në Pallatin e Rinisë dhe Sporteve në Prishtinë, teksa fillon në orën 19:00.
