Janë provat e fundit që po nxirren nga banesa e Fatmir Shehollit, personit të fundit të arrestuar në Kosovë, nën dyshimet për spiunazh.
Që prej kur u arrestua më 9 tetor, Sheholli ndodhet në paraburgim.
Ky nuk është rasti i vetëm i spiunazhit, i cili u hetua nga organet e sigurisë dhe hetuesisë në Kosovë.
Disa arrestime e bastisje për këtë lloj të veprës penale, u regjistruan gjatë muajve të fundit.
Të gjitha këto brenda vitit 2025 u finalizuan nga Prokuroria Speciale me katër aktakuza.
“Ju njoftojmë se që nga janari i vitit 2025, Prokuroria Speciale ka ngritur katër (4) aktakuza ndaj pesë (5) personave për veprën penale “spiunazh”, nga neni 124, paragrafi 3 lidhur me nenin 77 të Kodit Penal të Republikës së Kosovës”, thuhet nga Prokouroria Speicale.
Këtë vit u dha edhe verdikti i parë për një të akuzuar për spiunazh, i cili paraprakisht pranoi fajësinë.
Për mbledhje informatash si agjent i BIA-s që rrezikonin rendin kushtetues të Kosovës, Aleksandër Vlajiq u dënua me pesë vite burgim.
Në aktakuzë të përbashkët ndodhen Bedri Shabani e Muharrem Qerimi, për të cilët ka filluar përballja me drejtësinë për spiunazh.
Kurse, në raste të ndara Hysri Selimi dhe Jelena Gjukanoviq, patën seancat fillestare, ku mohuan fajësinë për spiunazh.
Në vazhdën e kësaj, kërkohet rritje e vigjilencës nga ana e institucioneve të sigurisë.
“Duhet thjeshtë me rrit vigjilencën më shumë, sepse na e dijmë që Kosova është një vend e teren i kogja i pjellshëm sa i përket veprimeve të agjenturave të ndryshme, me theks të veçantë të atyre që janë armike ndaj Republikës së Kosovës. Pra, këtu kemi të bëjmë kryesisht me Serbi, Rusi, Iran e disa vende të tjera, që kanë agjenda të tyre që mundohen me shfrytëzu territorin e Republikës së Kosovës për m’i avancu agjendat e tyre”, thotë Shkëlzen Sopiani – ish inspektori I AKI-së
Të gjitha këto llogariten edhe si rastet e para të spiunazhit që po trajtohen nga organet e rendit në vend.
