Adelina Hasani, studiuese e marrëdhënieve ndërkombëtare vlerëson se Kosova është dëmtuar jashtëzakonisht shumë me vendimin e së mërkurës kur u dënuan ish-krerët e UÇK-së, Hashim Thaçi, Kadri Veseli, Jakup Krasniqi e Rexhep Selimi me 81 vjet burg në total.
“Dëmet për Kosovën janë shumë të mëdha. Kosova do të sulmohet për faktin se krerët tanë janë dënuar në Hagë nga Dhomat e Specializuara”, ka thënë Adelina Hasani për emisionin “Këndi i Debatit” në Tëvë1.
Ajo vlerëson se Kosova duhet ta formojë një platformë në mënyrë që kauzën e saj të luftës së UÇK-së ta mbrojë në mediat ndërkombëtare.
“UÇK është bërë sepse nuk kemi pasur alternativë tjetër, këtu duhet të fokusohet fushata e Kosovës. Në mediat ndërkombëtare ne mund ta përdorim faktin se nuk jemi dënuar për krime kundër njerëzimit dhe për trafikim të organeve. Ne duhet t’i përdorim këto fakte. Duhet që së pari të përgatiten disa skenare, për nerrativat që duhet t’i përdorim tani”, vlerësoi Adelina Hasani.
