Kryetari i Aleancës për Ardhmërinë e Kosovës, Ramush Haradinaj, ka apeluar tek bashkatdhetarët që të mos e neglizhojnë rëndësinë e ditës së balotazhit më 9 nëntor për zgjedhjet komunale, duke i inkurajuar të ushtrojnë të drejtën e votës.
Përmes postimit në Facebook, Haradinaj ka paralajmëruar gjithashtu mundësinë e mbajtjes së zgjedhjeve parlamentare në muajin dhjetor.
“Më 9 nëntor mbahen zgjedhjet në balotazh për komunat e Kosovës. Mos e neglizhoni rëndësinë e ditës së balotazhit, votoni prej atje nëse mundeni, komunikoni me familjet dhe të njohurit tuaj në Kosovë, apo ejani edhe njëherë e votoni në Kosovë. Në dhjetor mund të mbahen edhe zgjedhjet parlamentare. Aleanca po rikthehet fuqishëm falë edhe juve, falë angazhimit të Diasporës. Të vazhdojmë të bashkuar si asnjëherë më parë, sepse Kosova na thërret”, ka shkruar ai në Facebook.
Në mesazhin drejtuar qytetarëve nga diaspora, Haradinaj ka theksuar edhe se kontributi i tyre ka qenë vendimtar në përkrahjen e Aleancës, duke kujtuar se ata nuk janë ndarë asnjëherë nga Kosova, as në kohët më të vështira si proceset në Hagë apo gjatë luftës së UÇK-së.
“E di se shumë prej jush jeni angazhuar shumë, si për zgjedhjet parlamentare në shkurt, ashtu edhe për zgjedhjet komunale tani. Keni votuar në Diasporë, keni kontaktuar familjarët tuaj dhe miqtë, dhe keni ardhur në Kosovë për ta përkrahur Aleancën. Besnikëria juaj është e rrallë, qëndruat me ne gjatë të gjitha sfidave. Haga 1, Haga 2 e sfidat e tjera, dhe nuk na latë asnjëherë vetëm, ashtu sikurse nuk e latë vetëm Kosovën në luftën e UÇK-së. Faleminderit nga zemra juve dhe familjeve tuaja”, ka theksuar ai./teve1.info/
