Degët lokale të Lidhjes Demokratike të Kosovës (LDK) dhe Partisë Demokratike të Kosovës (PDK) në Junik kanë nënshkruar një marrëveshje bashkëpunimi politik dhe bashkëqeverisjeje për mandatin 2025–2029.
Si pjesë e marrëveshjes, kandidati i PDK-së për kryetar të komunës është tërhequr nga gara dhe ka deklaruar mbështetje të plotë për kandidatin e LDK-së, Ruzhdi Shehu.
Ky bashkim pritet të mobilizojë strukturat dhe elektoratin e PDK-së në favor të Shehut në zgjedhjet e 12 tetorit. Shehu e përshkroi vendimin si një “hap të guximshëm dhe në dobi të qytetarëve” dhe theksoi se kjo marrëveshje është “shembull i politikës që ndërton ura, jo ndarje”.
“Kjo mbështetje garanton një mandat të dytë qeverisës më të fuqishëm dhe të gjithë qytetarët do të jenë të përfshirë në vendimmarrje. Fitorja e LDK-së është tashmë e pashmangshme, por të dielën fitojnë Juniku dhe junikasit pa dallim”, tha Shehu, duke falënderuar PDK-në për “aktin e përgjegjshëm dhe të guximshëm”.
Ai gjithashtu bëri thirrje që edhe kandidatët e tjerë të bashkohen me këtë vizion dhe u kërkoi qytetarëve të mbështesin këtë bashkim historik me votën e tyre. /teve1.info/
