Kuvendi i Republikës së Kosovës është konstituuar plotësisht pas zgjedhjes së deputetit Nenad Rashiq në pozitën e nënkryetarit të Kuvendit nga radhët e komunitetit serb.
Në seancën e sotme, Rashiq mori 71 vota për, duke përmbushur kështu edhe kërkesën kushtetuese për përfaqësimin e komuniteteve në Kryesinë e Kuvendit.
Lajmin e ka bërë të ditur kryetari i Kuvendit, Dimal Basha, përmes një njoftimi në profilin e tij zyrtar, ku theksoi rëndësinë e këtij vendimi për funksionalitetin e plotë të institucionit.
“Kam kënaqësinë t’ju njoftoj se sot, me 71 vota për, Kuvendi i Republikës së Kosovës zgjodhi deputetin Nenad Rashiq në pozitën e Nënkryetarit të Kuvendit nga radhët e komunitetit serb, dhe me këtë vendim Kuvendi është konstituuar plotësisht,” shkroi Basha.
Ai shtoi se me këtë hap është përmbyllur përbërja e Kryesisë së Kuvendit, ashtu siç parashihet me Kushtetutën e Republikës së Kosovës dhe Rregulloren e Punës së Kuvendit.
“Pas një periudhe të gjatë, Kryesia e Kuvendit është tashmë e kompletuar në përbërje të plotë,” shtoi ai.
“Falënderoj të gjithë deputetët e Kuvendit të Kosovës që me votat e tyre mundësuan konstituimin e plotë të Kuvendit në legjislaturën e IX-të.”
Kujtojmë se Dimal Basha e kishte konsideruar të konstituuar Kuvendin edhe javë më parë, megjithëse atëherë nuk ishte zgjedhur nënkryetari i pestë dhe nuk ishte votuar Nenad Rashiq. Mirëpo, Gjykata Kushtetuese kishte konstatuar se Kuvendi nuk ishte konstituuar në përputhje me kërkesat ligjore, çka çoi në mbajtjen e seancës së sotme konstituive.
