Në seancën e radhës gjyqësore ndaj Naim Murselit, Granit Plavës dhe Kushtrim Kokallës, ka dëshmuar Florian Avdija, bashkëfshatar i të akuzuarve dhe pronar i një lokali në fshat. Ai tregoi për kontaktet që ka pasur me ta, si dhe për një video që, sipas tij, i ishte dërguar nga njëra prej vajzave që kishte qenë me Granitin natën kritike.
“Jam marrë në pyetje në polici më 12 janar, për një biznes familjar që e kemi në fshat. Më kanë pyetur a i njoh Naimin, Granitin e Kushtrimin. I kam thënë po, se i kam bashkëfshatarë. Naimin e njoh më pak, se ka jetu jashtë. Nja dhjetë herë e kam pa, ndoshta krejt. E Granitin e Kushtrimin i njoh mirë, se i kam pas klientë të rregullt,” – deklaroi dëshmitari para trupit gjykues.
Avdija pohoi se kishte qenë në kontakt me Granit Plavën në natën e ngjarjes dhe se kishte pranuar një video nga ai:
“Më kanë pyetur a e kam kontaktu me Granitin natën kritike. Po, ai ka qenë në një klub nate në Prishtinë, përafërsisht kah ora 12. E kam pas një video incizim, e ka marrë policia. Qysh e mbaj mend, ka qenë Graniti me dy vajza, njëra Leonora. Saktë nuk më kujtohet.”
Prokurorja Javorka Perlinçeviq e pyeti dëshmitarin nëse kujton që në atë deklaratë kishte thënë se videoja i ishte dërguar nga Leonora, por ai nuk dha një përgjigje të prerë, duke thënë se nuk i kujtohet saktësisht.
Ai shtoi se Murselin e kishte parë rrallë në lokalin e tij:
“Kam deklaru se Naimi, maksimumi nja 10 herë ka qenë krejt. Ndërsa Kushtrimi e Graniti kanë qenë të rregullt, por nuk kam vërejtur diçka të keqe.”
I pyetur nëse të tre të akuzuarit kishin qëndruar ndonjëherë bashkë në lokal, dëshmitari tha:
“Nja dy herë kanë qenë Kushtrimi me Naimin. Më shumë jo. Asnjëherë nuk kanë qenë të tre bashkë.”
Prokurorja i rikujtoi se ai kishte deklaruar se tre javë para ngjarjes, të tre ishin parë në lokal:
“Po, tani më kujtohet. Por nuk kanë pasë kontakt mes veti. Në një tavolinë ka qenë Naimi me Granitin, kurse në tjetrën Kushtrimi me një kushëri.”
Në seancë reagoi edhe i akuzuari Naim Murseli, duke kundërshtuar deklaratat e dëshmitarit:
“I akuzuari Granit një ditë para ngjarjes thotë se kam qenë me Naimin te Beka në lokalin tuaj. Jo vetëm atë ditë – thotë se edhe një ditë përpara më ke parë me të,” – tha Murseli, duke shtuar:
“Jo, s’të kam pa ty asnjëherë bashkë me ta në lokal,” – ia ktheu dëshmitari.
Naim Murseli vazhdoi:
“Ne kemi qenë edhe shokë në rrjete sociale. Më shumë kemi qenë në Prishtinë…”
Dëshmitari e konfirmoi: “Në Prishtinë.”
Murseli shtoi gjithashtu:
“Florian, ju më keni takuar edhe disa herë me fëmijët e mi. Sepse, përveç pjesës së kafenesë, është edhe një pjesë marketi në lokal. Kjo e shpjegon pse thua tetë deri në dhjetë herë – sepse unë nuk kam ndejt në pjesën e kafenesë, por kam shku me ble bukë për fëmijë. A më ke takuar edhe me fëmijët e mi disa herë?”
“Po,” – u përgjigj dëshmitari.
Naimi shtroi edhe një pyetje tjetër:
“E me bashkëshorten, a më ke takuar ndonjëherë?”
Dëshmitari u përgjigj: “Nuk më kujtohet që të kam pa ndonjëherë me gruan tënde, as në lokal e as jashtë saj.”
