Prokuroria Themelore në Gjakovë ka nisur hetimet ndaj një personi me inicialet R.E., i cili dyshohet për përfshirje në tregtinë e narkotikëve, pasi gjatë një bastisjeje policore iu gjet një sasi e konsiderueshme droge.
Sipas njoftimit zyrtar, hetimet janë iniciuar pas një operacioni të zhvilluar më 8 tetor 2025, rreth orës 06:00 të mëngjesit, kur në shtëpinë e të dyshuarit në Gjakovë u zbuluan dhe u sekuestruan rreth 5 kilogramë e 43 gramë substancë e dyshuar për marihuanë.
Prokuroria ka dorëzuar në Gjykatën Themelore të Gjakovës kërkesën për caktimin e masës së paraburgimit prej 30 ditësh ndaj R.E., duke vlerësuar se ekziston dyshimi i bazuar se ai ka qenë i përfshirë në blerjen, posedimin dhe shpërndarjen e paautorizuar të lëndëve narkotike.
