Qeveria italiane do të dërgojë 500 ushtarë në Milano, gjersa u zotua për “një përgjigjje të fortë nga shteti” pas protestave kundër rritjes së kostos së jetesës e cila kaloi në përplasje me policinë dhe trazira.
Demonstrata të tjera janë paralajmëruar për të shtunën.
Qeveria e udhëhequr nga kryeministrja Giorgia Meloni, është duke planifikuar poashtu për të aprovuar shpejt masa më të ashpra të sigurisë, përfshirë zgjatjen e arrestit për të miturit, dhe ndalimin e tubimeve për njerëzit që konsiderohen rrezik publik, thanë mediat italiane të martën.
Policia në Milano ka arrestuar 271 të rinj pasi ata u vunë flakën koshave të mbeturinave, plaçkitën dyqane dhe dhe thyen dritare, gjatë trazirave në fundjavë.
Policia përdori gaz lotsjellës dhe ujë me presion për t’i shpërndarë grupet, të cilët ishin në periferi të një proteste që filloi në mënyrë paqësore.
Nga të arrestuarit, 23 janë të mitur dhe 13 janë të nacionaliteteve të huaja, sipas të dhënave të policisë.
Raportohet se njëra nga masat e sigurisë që po konsiderohet synon specifikisht gjeneratën e dytë të të rinjve imigrantë, të njohur si “maranza” – një njofkë që përdoret për të përshkruar bandat e të rinjve që zakonisht vinë nga zonat e margjinalizuara.
Shumë dyqane luksoze në lagjen e modës në Milano kanë vazhduar të qëndrojnë të mbyllura për shkak të frikës nga mundësia e trazirave të mëtejshme.
Koalicioni i Melonit, i cili përballet me zgjedhje të përgjithshme vitin e ardhshëm, thuhet se po planifikon dënime më të ashpra edhe për bllokadat rrugore, pas ditëve të protestave në jug të Italisë nga shoferët e kamionëve për çmimet e karburantit.
Ndërkohë, Milano po përgatitet për protesta të mëtejshme të shtunën, pasi një lëvizje e re, e quajtur 17 Tetori, u shfaq në mediat sociale duke thënë se do të demonstronte atje dhe në qytete të tjera të mëdha italiane çdo të shtunë pasdite “derisa të shembet kjo qeveri hajdutësh”.
