Gazetari Andi Bora ka komentuar ngjarjen tragjike që ka ndodhur këtë të hënë në ambientet e Gjykatës së Apelit në Tiranë, ku gjyqtari Astrit Kalaja u vra me armë zjarri nga një prej palëve në një proces gjyqësor, ndërsa dy persona të tjerë mbetën të plagosur.
Në një lidhje direkte në emisionin “Info Nata” në Tëvë1, Bora e cilësoi vrasjen si një ngjarje të paprecedentë dhe shumë të rëndë për sistemin e drejtësisë shqiptare.
“Kjo është një ngjarje shumë e rëndë dhe duhet të analizojmë të gjitha faktet. Nuk ka ndodhur më parë që brenda sistemit gjyqësor në Shqipëri të ndodhte një ngjarje e kësaj natyre, ku një gjyqtar të humbte jetën pikërisht në vendin e punës, aty ku ai jep vendime,” u shpreh Bora.
Sipas gazetarit, vrasja ndodhi gjatë dhënies së një vendimi në një çështje civile që kishte zvarritur prej vitesh në sistemin gjyqësor shqiptar.
“Gjyqtari u vra në momentin kur po jepte vendimin për një proces që kishte dy palë, ku njëra palë po humbiste pretendimin për një pronë, për të cilën pretendonin trashëgimi që nga viti 2012,” shpjegoi ai.
Bora dha edhe detaje rreth momentit të vrasjes dhe veprimeve të autorit të dyshuar, Elvis Shkëmbi – nip i njërit prej të përfshirëve në procesin gjyqësor.
“Në seancën që kishte nisur në orën 14:00 dhe kishte përfunduar rreth orës 15:30, nipi i personit të përfshirë në këtë proces, Elvis Shkëmbi, ka futur armën brenda sallës së gjyqit dhe ka qëlluar drejt gjyqtarit Astrit Kalaja,” tha Bora.
“Autori më pas ka qëlluar edhe ndaj palës tjetër në proces, konkretisht ndaj babë e bir, të cilët kanë mbetur të plagosur, por janë jashtë rrezikut për jetën. Pas kësaj, ai ka dalë nga salla, e ka dorëzuar armën te sigurimi dhe ka pranuar se ishte ai autori i vrasjes. Më pas është arrestuar menjëherë nga forcat e policisë që ndodheshin në ambientet e jashtme të gjykatës,” shtoi ai.
