Kryetari i Prishtinës dhe njëherësh kandidati i Lidhjes Demokratike të Kosovës për një mandat të dytë, Përparim Rama, ka njoftuar se në qershor të vitit të ardhshëm, trami elektrik do të bëhet pjesë e sistemit të transportit publik në kryeqytet.
Përmes një postimi në Facebook, Rama ka bërë të ditur se të hënën ka nisur bashkëpunimi ndërmjet Komunës së Prishtinës dhe operatorëve privatë të transportit, në kuadër të zbatimit të këtij projekti.
“Sot filloi zyrtarisht bashkëpunimi i Kryeqytetit me operatorët privat të transportit të ri të Prishtinës (TRIP) për zbatimin e projektit për tram-in elektrik. Ky është një tjetër hap drejt planit dhe vizionit tonë për mobilitetin në kryeqytet. Vizioni ynë po realizohet. Po e modernizojmë flotën e autobusëve sipas standardeve më të larta ndërkombëtare, po e ulim ngarkesën e trafikut në Prishtinë dhe po e vendosim qytetarin në qendër”, ka shkruar Rama në Facebook./teve1.info/
