Kryetari i Prizrenit, Shaqir Totaj, njëherësh kandidat i PDK-së për një mandat tjetër ka bërë të ditur se ka nisur puna për adresimin e çështjes së parkimit në këtë qytet.
Totaj ka treguar se synon të krijoj rreth 2 mijë vendparkingje të reja në katër lokacione strategjike të cilat sipas tij, janë vetëm faza e parë e një procesi që do ta modernizojë infrastrukturën e qytetit.
“Prizreni është një qytet që pret mijëra vizitorë çdo ditë, sidomos gjatë fundjavave dhe sezonit turistik. Kjo ka krijuar nevojën për një sistem të ri dhe të qëndrueshëm parkimi. Prandaj, kemi nisur një proces serioz për ta adresuar këtë problem në mënyrë afatgjatë. Këto 2 mijë vendparkingje janë Transformimi i Prizrenit tashmë ka nisur dhe do të vazhdojë me ritme të larta”, ka thënë Totaj.
Ai ka shtuar se këto parkingje do të jenë pjesë e konceptit të Prizrenit modern, që synon ta balancojë zhvillimin urban me nevojat e qytetarëve dhe të ekonomisë lokale.
“Do të ndërtojmë parkingje funksionale, të menaxhuara me standarde moderne, që jo vetëm do ta lehtësojnë qarkullimin, por edhe do ta përmirësojnë jetën e përditshme të qytetarëve. Kjo është pjesë e vizionit tonë për Prizrenin e transformuar”, ka theksuar ai.
