Ndër aktivistët nga 40 vende të botës që janë pjesë e Flotiljes Globale “Sumud” dhe që janë ndaluar nga Ushtria e Izraelit, është edhe aktivistja kosovare Albulena Fazliu.
Lajmi është bërë i ditur nga “Kolektivi për Mendim dhe Veprim Feminist” përmes një postimi në Facebook.
Sipas Kolektivit, Albulena Fazliu është refugjate e luftës nga Kosova, e cila aktualisht jeton në Gjermani.
“Kolektivi për Mendim dhe Veprim Feminist” u ka bërë thirrje autoriteteve të Kosovës që të kërkojnë nga shteti i Izraelit lirimin e menjëhershëm të Fazliut.
Postimi i plotë:
Ushtria gjenocidale dhe koloniale e Izraelit ka marrë peng mbi 500 aktiviste e aktivistë të cilët kishin marrë rrugën për në Gaza nëpërmjet Flotës Summud për t’i dërguar ndihma popullit palestinez.
Ndër aktivistët/et nga 40 vende të botës që kanë mësyrë të hapin koridor humanitar, është edhe Albulena Fazliu.
Albulena është refugjate e luftës nga Kosova në Gjermani e cila tashmë është kidnapuar nga Izraeli.
Shteti i Kosovës duhet të kërkojë menjëherë që Izraeli ta lirojë Albulenën dhe aktivistet e aktivistët tjerë dhe njëherë e mirë të marr pozicion politik dhe të thërras për ndalim të shfarosjes së popullit palestinez nga Izraeli.
Shteti dhe shoqëria jonë duhet të qëndrojnë krah Albulenës, popullit palestinez dhe gjithësecilës/it që është duke u angazhuar që Palestina të jetojë, dhe të jetojë e lirë.
