Kandidati i Partisë Demokratike të Kosovës (PDK) për kryetar të Komunës së Kaçanikut, Sabedin Vishi ka premtuar ndërtimin e dy shkollave të reja dhe dy çerdheve në komunë.
Në emisionin “Ditari” në Tëvë1, Vishi po ashtu, është zotuar për rritje të numrit të bursave për nxënës dhe studentë, si dhe transport falas për të gjithë nxënësit që udhëtojnë nga zonat rurale drejt shkollave të mesme.
“Me mua kryetar, nga 1 janari do të ketë rritje të numrit të bursave, transport falas për të gjithë nxënësit që udhëtojnë në shkolla të mesme nga viset rurale, ndërtim të dy shkollave të reja, dy çerdheve, si dhe dixhitalizim total të shkollave, përfshirë pajisjen me tabela dixhitale dhe kabinete të informatikës”, ka thënë ai.
Sa i përket zhvillimit ekonomik, Vishi ka premtuar krijimin e dy zonave të reja ekonomike, në fshatrat Koxhaj dhe Begrasë, të cilat, sipas tij, do të ndihmojnë në nxitjen e investimeve dhe krijimin e vendeve të reja të punës.
Në kuadër të politikave sociale, kandidati i PDK-së ka propozuar edhe një subvencion prej 200 eurosh për çdo të porsalindur në Komunën e Kaçanikut, me qëllim mbështetjen e familjeve të reja.
