Mysafiri nuk erdhi, prandaj dolën për të festuar.
Këta të rinj serb, u mblodhën mëngjesin e së hënës në Beograd, për t’iu gëzuar anulimit të vizitës së kryediplomatit rus, Sergey Lavrov.
“Sot, Serbia ka arsye që të festojë, sepse avokati i krimeve të luftës dhe përfaqësuesi i agresionit mbi shtetin sovran të Ukrainës nuk arriti ta vizitonte Beogradin. Krejt kjo, falë ndihmës së shteteve tona mike”, tha Cedomir Sojkovic, protestues serb.
Madje për këtë, kanë përgatitur edhe falënderimet për Maqedoninë e Veriut, Malin e Zi e Bullgarinë, që nuk i dhanë leje për fluturim, Lavrovit.
Por, ndërtesa para të cilës po protestojnë, megjithatë e priti një mysafir rus.
Brenda saj, presidenti serb, Aleksandar Vuçiq, priti në takim, ambasadorin rus, Aleksandër Botsan- Kharchenko.
Ky i fundit, e informoi presidentin serb në detaje, për arsyet e anulimit të vizitës së Lavrov në Beograd.
E të gjitha këto Vucic tha se ambasadori rus i solli të dokumentuara, por që do t’i shpalos në një intervistë televizive të hënën mbrëma.
Ndërkohë për këtë, është deklaruar edhe vet ministri i jashtëm i Rusisë, Sergey Lavrov.
“Vendimi është marrë nga disa anëtarë të NATO-s, dhe vendimet që penguan realizimin e kësaj vizite në Serbi, janë sigurisht të paimagjinueshme. Kjo ishte një privim i të drejtës së një shteti sovran për ta kryer detyrën në politikën e jashtme”, tha Lavrov.
Ndërkohë, profesori unveristar, Arben Fetoshi, thotë se veprimi i tri shteteve ballkanike, e tregon vendosmërinë e NATO-së, për të mos lejuar që agjenda ruse të dalë jashtë zonës së konfliktit në Ukrainë.
“Unë besoj që është një mesazh i qartë i NATO-së, për të mos lejuar viziten e Lavrov në Beograd, aq më tepër duke i pasur parasysh raportimet që ne Beograd do të vinte edhe Dodik, që me automatizëm i ngriste shqetësimet për arsyet e vizitës së tij”, deklaroi Fetoshi.
Pas deshtimit të kësaj vizite, autoritetet ruse kanë ftuar ministrin e jashtëm serb, Nikola Selakovic, që ta vizitojë Moskën.
Raporti i gazetarit Fidan Zejnullahu.
