Kryetari i Kuvendit të Kosovës, Dimal Basha, ka kujtuar 28-vjetorin e protestave historike të 1 Tetorit 1997, duke vlerësuar këtë datë si një nga më të rëndësishmet në historinë e rrugëtimit të Kosovës për liri.
Në një postim në Facebook, Basha ka theksuar se 1 Tetori, që prej themelimit të Universitetit të Prishtinës, ka qenë dita simbolike e fillimit të vitit akademik, por pas përjashtimit të dhunshëm të studentëve dhe profesorëve shqiptarë në vitin 1990 nga regjimi i Millosheviçit, mësimi u detyrua të vazhdojë në shtëpi e objekte private.
Ai ka shtuar se këto protesta u bënë pararendëse të organizimeve të mëvonshme popullore dhe çlirimit të Kosovës në vitin 1999, duke i cilësuar studentët e asaj kohe si “zëri i një kombi të tërë”.
Postimi i plotë i Dimal Bashës
1 tetori, që prej themelimit të Universitetit të Prishtinës, ishte dita e fillimit të vitit të ri akademik. Por nga viti 1990, kur profesorët e studentët shqiptarë u përjashtuan dhunshëm nga hapësirat universitare nga regjimi fashist i Millosheviçit, viti akademik nuk zhvillohej më në amfiteatrot e Universitetit, por nëpër shtëpi e lokale private të shndërruara në klasa.
Më 1 tetor 1997, studentët dhe profesorët zgjodhën që dita e parë e vitit të ri akademik të shënohej me një akt, i cili u bë rrethanë e çmuar me ndikim të madh historik: protestat studentore që tronditën Kosovën, e bënë edhe botën të shihte me sy të lirë shtypjen në të gjitha sferat jetësore që ushtrohej ndaj shqiptarëve.
Atë ditë, të prirë nga Rektori Ejup Statovci, bashkë me profesorë dhe mijëra studentë, vala e studentëve u nis nga lagjja Velania për në kampusin universitar. Marshimi i tyre u përball me kordone të hekurta të policisë serbe, që reaguan me dhunë brutale, me rrahje e arrestime, por pa mundur ta zbehin qëndresën e vendosmërinë e asnjërit protestues. Në mes të dhunës, para syve të gazetarëve nga gjithë bota, studentët e Universitetit të Prishtinës e ngritën zërin e një kombi të tërë që kërkonte dije, barazi e liri.
Si i tillë, 1 tetori i vitit 1997 shënoi kthesën e madhe. Regjimi shovinist sado që rriste dhunën, filloi të lëkundej. Studentët në këmbë u bënë pararendës të rrugës që çoi drejt organizimit të mëtejmë popullor, daljes publike të Ushtrisë Çlirimtare të Kosovës dhe çlirimit përfundimtar të vendit tonë në qershor të vitit 1999.
Sot, 28 vjet më pas, kujtojmë me nderim dhe mirënjohje të gjithë ata që morën pjesë në protestë, duke e bërë meritorisht 1 tetorin ditë të studentëve dhe një nga datat më domethënëse të rrugëtimit tonë për liri.
Nderime të gjithë pjesëmarrësve të protestave të 1 tetorit 1997!
Nderime për të gjithë personelin akademik të kohës me në krye rektorin Ejup Statovci!
